അവന്ടെ ഷർട്ട്‌ എന്തു പിഴച്ചു.?

അവൻ വീട്ടിലെ  കട്ടിലിൽ കിടക്കാൻ നേരം കോളേജിലെ ഒരു സംഭവം അവന്റെ ഉറക്കം അലോസരപ്പെടുത്തി.

*****

അന്ന് കോളേജിൽ പോകാൻ അവന് ഒരു പ്രത്യേക ഉഷാറായിരുന്നു.
കാരണം  അവന്ടെ പ്രണയിനി അന്ന് സാരി ഉടുത്തായിരിക്കും കോളേജിൽ വരുക.
അവൻ അവളെ അന്ന് വരെ സാരിയിൽ കണ്ടിട്ടില്ലാരുന്നു.
ഇന്ന് രണ്ടുപേരും ഒരുമിച്ചിരുന്നു ഒരു ചിത്രം എടുക്കണം എന്നൊക്കെ അവൻ മനസ്സിൽ വിചാരിച്ചു. അവന്ടെ മൊബൈലിലെ ക്യാമറ തല്ലിപ്പൊളിയാണ്.  അതിലൂടെ നോക്കിയാൽ അപ്പുറത്ത് അഗാധമായ കൂരിരുട്ടു മാത്രം കാണാം. പിന്നെ കയ്യിൽ ഉള്ളത് ഒരു ലാപ്ടോപ് ആണ്.
തമ്മിൽ ഭേദം തൊമ്മൻ എന്നുംവിചാരിച് ലാപ്ടോപ് ഉം എടുത്തോണ്ട് അവൻ കോളെജിലേക്ക് കാൽനടയാത്ര ആരംഭിച്ചു.  എല്ലാ  ദിവസവും ഉച്ചയൂണിനു ശേഷം  അവനും അവളും തമ്മിൽ കാണുന്ന പതിവ് ഉണ്ടായിരുന്നു. അവർ ഇങ്ങനെ ഇരുന്നു എന്തേലും ബടായി  അടിചോണ്ടിരിക്കും.
അന്ന് ഉച്ചയൂണിന്റെ സമയത്ത് ആലോചിച്ച കാര്യങ്ങളൊക്കെ  നടത്താം  വിചാരിച്ചു അവൻ സമാധാനമായി ലാപ്ടോപ് ഉം പിടിച്ചോണ്ട് ക്ലാസിലേക്ക് പോയി.

ഉച്ചയൂണിന്റെ മണി നീട്ടിമുഴങ്ങി. അല്ലെങ്ങിൽ അവനു ആ മണിയുടെ കരകരാ  എന്നുള്ള ശബ്ദം കേൾക്കുന്നത് എന്തോ പോലെയാണ്. പക്ഷെ ഇന്ന് ആ മണിമുഴക്കത്തിനു എന്തോ ഒരു സുഖം.

ആ മണി മുഴങ്ങുന്നത് കേട്ടപ്പോൾ, മോഹൻലാൽ ഒട്ടോക്കാരനായി അഭിനയിച്ച സിനിമയിൽ നായിക നായകനെ
' സുധീ...............' എന്ന് നീട്ടി വിളിക്കുനത്പോലെ അവനു തോന്നി.

അത്രക്കും ഒരു സുഖം.

വിശപ്പടക്കാൻ  എന്തൊക്കെയോ കഴിച്ചിട്ട് അവൻ അവളെ കാണാനായി ഓടി.
അങ്ങനെ പതിവുസ്ഥലത്ത്  അവർ രണ്ടുപേരും സ്ഥാനമുറപ്പിച്ചു.
അവളുടെ സാരിയെക്കുറിച്ച്  കുറച്ചു നല്ല വർത്തമാനം ഒക്കെ പറഞ്ഞിട്ട് അവൻ മയത്തിൽ ലാപ്ടോപ് എടുത്തു മടിയിൽ വെച്ചു .
ഫോട്ടോ എടുക്കാനായി വെബ്ക്യാം തുറന്നു. അവളോട് പറഞ്ഞു.

"നമ്മുടെ ഒരു ഫോട്ടോ എടുക്കട്ടെ. നിന്നെ ആദ്യമായിട്ട് സാരിയിൽ കാണുന്നതല്ലേ."

എന്നും പറഞ്ഞ്  അവൻ രണ്ടുപേരെയും ക്യാമറയിൽ കിട്ടുന്നവിധം തയ്യാറാക്കി.
അപ്പോളാണ് അവളുടെ വളിച്ച കമന്റ്‌.

"ഇപ്പൊ വേണ്ടടോ. തന്ടെ ഈ ഷർട്ട്‌ ഒരു സുഖമില്ല. വേറൊരു ദിവസം എടുക്കാം."

അവൻ ആലോചിച്ചു.
'ഇവൾക്ക്‌ എന്നെക്കാളും ഇഷ്ടം എന്റെ ഷർട്ട്‌ ഇനോടാണോ.'

*****

അവൾ പറഞ്ഞത്പോലെ വേറൊരു ദിവസം രണ്ടു വർഷം കഴിഞ്ഞിട്ടും ഉണ്ടായില്ലലോ  എന്നോർത്ത് അവൻ ഉറങ്ങാൻ കിടന്നു...

* * * * * * * * * * *